Stampmotorwedren by kleinplasie sal kansa baat

Die Mega Oval-stampmotorklub in Worcester hou Saterdag 20 Oktober ‘n spesiale stampmotorwedren by Kleinplasie ten bate van Kansa.

Dit gaan nie sommer jou gewone stampmotorbyeenkoms wees nie en beloof om hope pret en plesier vir oud en jonk in te hou.

Die hekke open 11:00.

Dit is vanjaar die eerste amptelike wedren wat deur die klub gehou word en daarom het hy dit goedgedink om ‘n gedeelte van die opbrengs aan Cansa Relay for Life te skenk. “Ons het voorheen ‘n wedren net vir vroue gehou,” se Suzaan Bredenhann, een van die organiseerders.

“Wat dit ook spesiaal maak, is dat ons eerste wedren ook vir kankerbewusmaking was. Ons gaan vermaak word deur Nic Stevens en ons gaan ook ‘n paraderondte met kankeroorwinnaars doen waarna ons vir elkeen ‘n spesiale borsspeld gaan aansteek. Een van ons lede se vrou, Chantelle van Dyk, is die ambassadeur. Ons samel ook niebederfbare produkte in,” se Suzaan.

“Die KykNet TV-program Kwela gaan die geleentheid opneem en mense kan die geleentheid gebruik om saam met die aanbieder, Andre Weideman, ‘n rondte te doen,” voeg sy by.

Verskeie kos-en inligtingstalletjiessal beskikbaar wees. Besoekers kan ‘n houtstrikkie teen R10 koop om hul steun vir kankerbewusmaking te wys.

‘n Mej. Mega Oval sal later die aand aangewys word asook ‘n Fopdosser Mega Oval vir die mans.

Source: Worcester Standard News