Daars Nuwe Pre-Historic SSIC park in PTA Oos
Pretoria-Oos verwelkom sy eie “Pretoria-ssic” Park ‘n Droom het uiteindelik waar geword vir Renske Hayes, ‘n Pretoria-Oos entrepreneur en sakevrou met ‘n passie vir prehistoriese wesens. Haar begeerte om dinosourusse aan die publiek te wys en die waarheid oor hierdie reusewesens te deel, het nou fisies vorm aangeneem naby The Grove-winkelsentrum.
Met die skep van ‘n unieke park op ‘n halwe rugbyveld langs ’n karnavalterrein, het Hayes se visie begin realiseer. Sy wou nie net aan mense die majestueuse groot diere wys nie, maar ook van die mites wat in populêre films gesien word, regstel. Die projek het ‘n besondere plek in haar hart, en ook vir haar drie kinders, wat saam met haar die liefde vir dinosourusse deel.
Om hierdie droom te verwesenlik, het Hayes ‘n uitgebreide navorsing oor dinosourusse gedoen en uiteindelik na ‘n vooraanstaande fabriek in China gereis. Hier het sy ‘n span talentvolle vakmanne gevind wat lewensgetroue dinosourusmodelle skep, met noukeurige aandag aan die kleinste besonderhede.
China is bekend vir sy fossiele en wetenskaplike navorsing oor dinosourusse, wat beteken dat die vakmanne streng volgens wetenskaplike illustrasies en navorsingsdata werk. Elke dinosourusmodel begin met ‘n staalraamwerk wat in presiese proporsies gesweis word. Hierdie raam word dan met spons en plastiese hars oorgetrek, wat sorg vir ‘n realistiese voorkoms, van die lang nekke tot die kenmerkende plooie en veltextuur.
Renske Hayes.
“Die detail wat hulle aanwend, is verstommend,” sê Hayes. “Elke plooitjie en velskerfie word met die hand geskep om so akkuraat moontlik te wees.”
Hierdie park bring nou vir jong en oud die wonder van die prehistoriese wêreld in Pretoria-Oos tot lewe, en bied ‘n uitsonderlike geleentheid om ‘n kykie te kry in die wêreld van dinosourusse – ver van die onwaarhede van Hollywood af.
Related Articles
