5 500 Kersklappers bring Hoop en Omgee

Catrien van Rooyen van East Lynne het vanjaar ’n eenvoudige idee omskep in ’n sprankelende liefdadigheidsprojek wat die ware gees van Kersfees weerspieël.

Met blink papier, kleurvolle lint en ’n hart vol omgee het sy meer as 5 500 Kersklappers met lekkernye gemaak en dit aan verskeie organisasies oorhandig – sodat kinders en gesinne in nood hierdie feestyd ’n bietjie ekstra vreugde kan ervaar.

Die projek is met groot entoesiasme ondersteun deur Angels for the Community, wat saam met Van Rooyen die klappers versprei het na kinderhuise, dagsorgsentrums en welsynsgroepe.

Vir Van Rooyen was die inisiatief nie net ’n daad van gee nie, maar ook ’n persoonlike huldeblyk aan haar pa, Hannes Matthee, wat vroeër vanjaar oorlede is. Sy vertel dat die werk aan die klappers haar genesing, troos en nuwe hoop gebring het ná ’n moeilike jaar.

Benewens die duisende klappers het sy ook ’n reuse-Kersklapper van meer as ’n meter lank gemaak – ’n vrolike middelpunt vir lootjies en fondsinsamelings wat verdere welsynsprojekte moontlik maak. Die oorhandiging het plaasgevind in die Immanuel Volle Evangelie Kerk, ’n plek vol kosbare herinneringe vir haar en haar familie.

Met elke klapper wat oopgemaak word, glo Van Rooyen dat ’n vonkie van hoop en lig die gemeenskap aanraak. Haar droom is eenvoudig maar kragtig: om die vreugde van Kersfees te deel en die geskenk van hoop aan ander oor te dra.