Plaaslike atlete van die Overberg gereed vir die Olimpies
“Dit maak nie saak of dit ses maande of ses jaar neem nie – ek sal slaag. Ek sal my droom bewaarheid.”
Hierdie aanhaling van ‘n onlangse Facebook-plasing som die deursettingsvermoë en toewyding van die talentvolle Adrian Swart (22) van Caledon, wat droom om aan die Olimpiese Spele deel te neem, perfek op.
Dieselfde kan gesê word van Victor Hogan (34), tienmalige Suid-Afrikaanse en driemalige Afrika-kampioen in diskusgooi.
“Ek het ‘n lang loopbaan gehad, maar dit was nie altyd maklik nie. Ek wil wys dat jy, selfs al kom jy van ‘n klein dorpie soos Kleinmond, dit tot by die grootste sportgebeurtenis kan maak as jy volhard en glo dat dit moontlik is,” vertel Victor.
Trotse inwoners van Kleinmond het die hoofweg gevul om Victor met lawaaiende sirenes en verkeersbeamptes na die lughawe te groet en voorspoed toe te wens.
Adrian, wat aan die Universiteit van Noordwes studeer, het reeds vroeër na Nederland vertrek om voor te berei vir wedlope in Europa voordat hy op 22 Julie by die Suid-Afrikaanse span in Montpellier, Frankryk, aangesluit het.
Adrian is deel van die nasionale aflosspan wat aan die 2024 Olimpiese Spele in Parys gaan deelneem.
Uitsonderlike Talent
Albei atlete, wat hul hoërskoolloopbaan aan die Hoërskool Overberg voltooi het, het reeds sedert laerskooldae in sport uitgeblink.
Adrian vertel: “Ek het van graad een by die Laerskool Overberg aan verskeie sportsoorte deelgeneem – van rugby, krieket en atletiek tot hokkie. Ek was baie goed in rugby – selfs beter as in atletiek op daardie stadium.”
Hy het van graad 4 tot graad 7 Boland-kleure in hoogspring verwerf, wat hom laat besef het dat hy ‘n besondere talent vir atletiek het.
Ander hoogtepunte in sy sportloopbaan sluit in ‘n derde plek in die 200 m-hekkies by die SA Skole-atletiekbyeenkoms, toe hy Cornel Fredericks se rekord in die 200 m-hekkies en die SA rekord in verspring verbeter het. Hy het ook Boland-kleure in rugby verwerf en vanjaar teen sy rolmodel, Wayde van Niekerk, by die SA kampioenskap meegeding.
In 2021 het hy die land verteenwoordig by die o.20-wêreldkampioenskap in Kenia en vroeër vanjaar was hy deel van die nasionale span wat aan die CAA Afrika-senior kampioenskap in Kameroen deelgeneem het.
Maar sy grootste prestasie tot dusver is sy insluiting in die Olimpiese span. “Dit is iets waarvan ek al droom sedert ek in graad vier was,” vertel hy.
Sy grootste ondersteuners is sy pa, Riaan Swart, sy ma, Cathleen, en sy oudonderwyser Louis Kriel, wat hom gehelp het nadat sy pa in 2017 oorlede is. Hy het ook sy borge – die Caledon-sosiale gholfklub, Theewaterskloof Caledon, Napa Civils, Rola Ford Caledon, Edith Wynne Trollip, Nissan Holdings, Retha Louw en Edwin Marthinus – bedank.
Rolmodelle vir die jeug
“As dit nie vir Meneer Kriel was nie, sou ek nie my drome nagejaag het nie. My pa was my grootste ondersteuner en my ma het altyd in my geglo,” sê Adrian. “Vandag sê sy haar seun gaan Olympics toe.”
Victor het ook in verskeie sportsoorte, waaronder gewigstoot, uitgeblink. Sy belangstelling in atletiek het by Laerskool Kleinmond begin. Hy het aan rugby, krieket en gholf deelgeneem.
Hy het sy niche gevind toe hy saam met ‘n vriend diskus geoefen het. Aanvanklik was hy nie goed nie, maar hy het volgehou en uiteindelik sukses behaal.
Victor het aan ses wêreldkampioenskappe deelgeneem en talle rekords oortref. Sy mentors, Kaai Preller en John Smit, het hom aangemoedig om nooit op te gee nie.
“Ons het in 2020 met ‘n vierjaarprogram begin en ek het verlede jaar my persoonlike beste van 66.14 m gegooi,” sê Victor. “Ek is dankbaar vir hulle insette in my lewe. Nou is ons gereed vir die Olimpiese Spele.”
Adrian se motto is: “Impossible is nothing” en hy droom daarvan om ’n verskil in ander jong mense se lewens te maak en in sy gemeenskap terug te ploeg.
“Ek wil nie net onthou word as die eerste een van Caledon wat na die Olympics gegaan het nie. Ek wil onthou word as die jongman wat ’n verskil in ander jong mense se lewens gemaak het.”
Related Articles
